購物車

從新檢討讀寫障礙人
日期:2023-09-14

你知唔知道維珍集團大老闆李察・布蘭森Richard Branson、思科系統前總裁約翰・湯瑪士・錢伯斯 John Thomas Chambers、《不可能的任務》系列電影巨星湯姆・古魯斯Thomas CruiseIKEA 創辦人英格瓦・坎普拉Feodor Ingvar Kamprad,同新加坡前總理李光耀有咩共同點?佢哋都係讀寫障礙者。

近十年,醫學界出現咗一個新嘅觀念框架:腦神經多樣性。腦細胞網絡接駁唔同,人嘅注意力、學習能力、社交能力、甚至同理心等等,都可以大大唔同。有啲目前當係病態,其實只係唔同。

一直以來,智商爆煲,就畀人讚係天才;而有學習困難,運算慢就畀人話係蠢。但古代大將,不少都係四肢發達,墨水冇幾多,甚至係目不識丁,但當年做得到封疆大巨,掛印元帥;現今,搵食可能只能做保安或片場武角。

所以,不同社會環境下,不同嘅能力會突顯出來,受人尊重,不同嘅弱點亦畀人醜化,排斥。人腦雖然話細胞有860億,組成嘅網絡數目以億計,但資源始終有限,會顧此失彼。因此,某方面強,難免亦可能另一方面弱。

所以,從多樣性角度去睇人,就唔可以只係睇佢弱點,而係亦要注意到佢嘅優點。佢可能係社會現今標榜嘅標準下差過普通人,但佢其實有其他強項。

如果我哋只係話格雷塔・童貝里Greta Thunberg有自閉症,掠過唔提佢使全世界  關心地球暖化,或者只係講莫扎特有多動症,多時口出穢言,而唔提佢古典音樂成就,啱唔啱?

以讀寫障礙為例,華人社會自古以來,重視讀書。因此,患此弱點,自然吃虧,喺學校畀老師同學睇唔起,話蠢或唔用功。古代時,更會係一世都抬唔起頭見人。

但係,讀寫障礙遺傳因素影響占六成,患者占全球5-20%人口。從演化角度分析,如果呢個係一個弱點,早都應該被淘汰,冇理由可以流傳落來。換言之,讀寫障礙者,其實身藏特技未為人知而已。

研究發現有讀寫障礙者,往往反而比一般人更容易睇明宏觀變化,掌握大局形勢和走向。普通人見唔到嘅聯繫,佢一望就見。因此,佢哋創新能力會比較高;藝術界、工程界、創業人中讀寫障礙者比例較高。美國有調查發現創業人中35%有讀寫障礙,22%仲屬嚴重讀寫障礙者。心理學測試亦發覺讀寫障礙者有啲測試比常人差,有啲卻比常人優勝好多。

即是話,好多讀寫障礙者喺探新獵異,思前人所未思,創前人所未創,闖前人所未識闖。當環境轉變,面對新形勢,社會係需要讀寫弱但會腦袋急轉彎嘅人挺身而出。華人千年來,以考試淘汰讀寫障礙人,可能亦係點解華人中探險家少,固步自封者多,閉關鎖國者多。

所以,用太狹窄標準來定正常而欠缺全面評估,係有問題嘅。係時候從新檢討我哋點評估人,點樣稱呼描述佢哋了。